حرت ما بين ابطل بين أجاريك
بسك يا شعر محتاج راسي
أنه لساني متر والموت شبرين
وخايف على اطفالي من السياسي
كولشي يجوزلك وشتكتب يصير
الممنوع تكتب على الكراسي
اكتب عالغزل عالفرح عالخير
شوكت هذا الشعب شاف المآسي
البصر مرات يخدع بالك تشوف
باوع عالوضع بعيون حولة
النفط والغاز
يوصل بالانابيب
بس عن الحسد خلينة جولة
اغمد سيف حرفك بالك تثور
العمر مرهون بالحرف التكولة
لا تهدد صرح يالسكفك تراب
عندي اطفال مو وكت البطولة
الناس بلا عقل لا تنصح الناس
ياهو اليجي كال نريد تفسير
ابتلى المسؤول بلوة بحصة الناس
بشر هوة شنو هو المسؤول شيصير ؟
الحصة التجي والماتجي تهون
على مود جان ياكل خبزة شعير ؟
انتقد هذا الوضع بس بكياسة
وامدح لا تذم المدح هم زين
يسقط هالشعب تحيا السياسة
المعلم خل يموت طبة طوبين
نحير بروسنة لو بالدراسة
ولك بيع البلابل والحمامات
الوكت هسة وكت جلب الحراسة
حاير بالوطن شعليك ؟ شتريد ؟
بيتك من خشب لتسب القصور
عمر صار اربعين نعيش عميان
اتمنى العمى شيفيدنه النور
ترف جلد الحياية ارسمهة وتعيش
اموتك يا قلم من ترسم طيور
شعليك الحواجز حاطن البيت
عندك بيت خاطر تبجي عالسور
يا مبدأ ولك ونعيشة بالدين
ارد ارتاح واصحى لزماني
احترك جد الفقير القلبة على الناس
الرضى بقسمته وما صار اناني
والف رحمة على ابية الباك الفلوس
دعاء الوالدة لكل برلماني
راضي بقسمتي ولساني محبوب
اعيش بيش لو كصوا لساني
لا تشتم سكوفهم وانت مكشوف
يمعود يا وطن دبرلي ايجار
اصاحب كل حرامي يبوكلي بيوم
وامنع كل شريف يطبلي خطار
عار يصير سهلة نحملة يومين
تصير فلوس عدنة ونغسل العار
يرجف صوت كل من رافك الجوع
ومترهي ترة اليسولف العندة
ولك مشروع مشروعين ونتوب
النعامة تصيرلي فراش ومخدة
ياهو احسن ضمير وعايش بضيم
ابيعة واستلم بالشهر شدة
ازرع قنبلة يا شعر ارتاح
ترة اني اتقشمرت لما كلت وردة
شكرا للنقل الجميل لم اعرف ان هذا الرجل ممكن ان يكتب مثل هكذا شعر
ReplyDeleteشكرا علاوي وهم ما انتخبك ههههههههه